محمد عامر کو پی سی بی نے دورہ انگلینڈ کیلئے طلب کرلیا

پاکستان کرکٹ بورڈ (پی سی بی) نے تصدیق کرتے ہوئے کہا ہے کہ  فاسٹ باؤلر محمد عامر دورہ انگلینڈ میں قومی کرکٹ ٹیم کو جوائن کریں گے۔

گزشتہ روز ذرائع سے یہ خبریں گردش کررہیں تھیں کہ فاسٹ باؤلر محمد عامر کو دورہ انگلینڈ کیلئے پاکستان کرکٹ بورڈ نے طلب کرلیا جس کی باقائدہ تصدیق  پی سی بی کی جانب سے کردی گئی ہے، محمد عامر بچے کی پیدائش کے باعث دورہ انگلینڈ سے دستبردار ہوگئے تھے۔

پی سی بی نے فاسٹ باؤلر محمد عامراور نیشنل ہائی پرفارمنس سنٹر میں مساجر کی ذمہ داریاں نبھانے والے محمد عمران کو انگلینڈ بھیجنے کا فیصلہ کیاہے،کورونا پروٹوکول کو مدنظر رکھتے ہوئے محمد عامر اور محمد عمران  کی جہاز پر روانگی سے قبل ان  کے کوویڈ19 کے 2 منفی ٹیسٹ آنا لازمی ہے۔

پی سی بی کے مطابق دونوں کا پہلا کوویڈ 19 ٹیسٹ آج (20 جولائی) بروز پیر کولیا گیا ہے، دونوں ۔ پہلے ٹیسٹ کی رپورٹ منفی آنے  کی صورت میں انہیں لاہور کے بائیو سیکیور ماحول بھجوادیا جائے گا جہاں بدھ کو ان کا دوسرا کوویڈ 19 ٹیسٹ لیا جائے گا۔

محمد عامر کےانگلینڈ میں اسکواڈ کو جوائن کرنے کی صورت میں وکٹ کیپر بیٹسمین روحیل نذیر کو اسکواڈ سے ریلیز کردیا جائے گا۔

دوسری طرف آلراؤنڈر شعیب ملک کی انگلینڈ روانگی میں اگست کے دوسرے ہفتے تک تاخیر ہے کیونکہ بھارت میں 31 جولائی تک سفری پابندیوں کے باعث شعیب ملک کی فیملی ری یونین بھی تاخیر کا شکار ہے۔28 اگست سے شروع ہونے والی ٹی 20 سیریز کیلئے اسکواڈ کو جوائن کرنے والے شعیب ملک کی انگلینڈ روانگی کی صورت میں اسکواڈ سے ایک کھلاڑی کو ریلیز کردیا جائے گا۔