لاہور‘ لاڑکانہ ( نمائندہ جسارت‘ آن لائن) پیپلزپارٹی کے چیئرمین بلاول زرداری لاہور پہنچ گئے، جہاں ن لیگی رہنمائوں سے رابطے کا امکان ہے۔ ذرائع کے مطابق رہنمائوں کے درمیان آل پارٹیز کانفرنس کے ایجنڈے پر مشاورت ہوگی۔ یاد رہے کہ بلاول زرداری30 جون کو بھی لاہور آئے تھے اورایک ہفتے سے زائد قیام کے دوران کسی لیگی رہنما نے ان سے رابطہ نہیں کیا تھا جس کے بعد چیئرمین بلاول زرداری مایوس ہوکر کراچی روانہ ہوگئے تھے۔ ن لیگ کے بلاول زرداری سے بیک ڈور رابطوں کے بعد پیپلزپارٹی اور ن لیگ کے درمیان معاملات طے ہوئے ہیں جس کے بعد بلاول زرداری ایک بار پھر اپوزیشن کو اکٹھا کرنے کے مشن میں متحرک ہوگئے ہیں۔قبل ازیں پیپلز پارٹی کے چیئرمین بلاول زرداری کی گڑھی خدا بخش میں شاہنواز بھٹو کے مزار پر آمد ۔ ا س سلسلے میں فاتحہ خوانی اور دعا ئے مغفرت کی گئی۔ اس موقع پر انہوں نے کہا کہ شاہنواز بھٹو نے جمہوریت کی بالادستی اور ڈکٹیٹر کے خلاف مزاحمت کی لازوال مثال قائم کی۔
