لاڑکانہ (نمائندہ جسارت) ایس ایس پی لاڑکانہ مسعود احمد بنگش کی ہدایات پر لاڑکانہ پولیس نے جرائم پیشہ افراد کیخلاف کارروائیاں کرتے ہوئے دو ملزمان کو گرفتار کرکے اسلحہ، چوری شدہ موٹر سائیکلیں، سولر پلیٹ، پنکھے اور واٹر موٹر برآمد کرکے مقدمات درج کرلیے ہیں۔ رتو ڈیرو پولیس نے دوران چیکنگ میرپور ماتھیلو ضلع گھوٹکی کے رہائشی ملزم برکت لونڈ کو ٹی ٹی پستول اور گولیوں سمیت، اللہ آباد پولیس نے روپوش ملزم طفیل میمن کو گرفتار کرلیا۔ دوسری جانب مارکیٹ پولیس نے چوری شدہ موٹر سائیکل برآمد کرکے اصل مالک عبدالفتاح کے حوالے کردی۔ انچاج مددگار بیس ون سید اصغر علی شاہ نے عاقل روڈ پر جرائم پیشہ افراد سے مقابلہ کرکے رحمت پور تھانے کی حد سے چوری ہونے والی موٹر سائیکل برآمد کرلی۔ رتوڈیرو پولیس نے گاؤں نبی بخش جلبانی کے اسکول سے چوری ہونے والا سامان سولر پلیٹ، پنکھے اور واٹر موٹر برآمد کرکے اسکول کے ہیڈ ماسٹر کے حوالے کردیا ہے۔
