سکھر (نمائندہ جسارت) خون سفید ہوگیا، پنوعاقل میں چھوٹے بھائی نے بڑے بھائی کوسیاہ کاری کے معاملے پر قتل کردیا، ملزم گرفتار، مقتول کی لاش پوسٹ مارٹم کے بعد ورثا کے حوالے، پنو عاقل کے سٹی پھاٹک علاقے میں ایک شخص سلیم چاچڑ نے اپنے بڑے بھائی نعمت اللہ چاچڑ کو پستول سے فائر کرکے قتل کردیا اور فرار ہوگیا، پولیس نے اطلاع پر جائے وقوعہ پر پہنچ کر مقتول کی لاش تحویل میں لے لی اور ملزم کو گرفتار کرلیا۔ مقتول کے ورثا کے مطابق کچھ روز قبل ملزم نے اپنی بھابھی (مقتول کی بیوی) پر برادری کے ایک نوجوان کے ساتھ سیاہ کاری کا الزام عائد کیا تھا اور اپنے بڑے بھائی سے بیوی کو گھر سے نکالنے کا مطالبہ کیا تھا، جو نہ ماننے پر اس نے اپنے بڑے بھائی کو قتل کردیا۔ پولیس نے مقتول کی لاش پوسٹ مارٹم کے بعد ورثا کے حوالے کردی ہے۔ پنو عاقل کے قریب موٹر سائیکل کی راہگیر کو ٹکر، راہگیر زخمی، اسپتال لے جاتے ہوئے جاں بحق، موٹر سائیکل سوار گرفتار، لاش پوسٹ مارٹم کے بعد ورثا کے حوالے۔ پنو عاقل کے قریب ایک تیز رفتار موٹر سائیکل نے راہ گیر کو ٹکر ماردی جس کے نتیجے میں راہگیر صابر حسین شدید زخمی ہوگیا، مقامی افراد نے زخمی کو فوری اسپتال پہنچانے کی کوشش کی تاہم اسپتال لے جاتے ہوئے وہ جاں بحق ہوگیا۔ لاش ضروری کارروائی کے بعد ورثا کے حوالے کردی گئی جبکہ پولیس نے موٹر سائیکل سوار رفیق لغاری کو گرفتار کرکے موٹر سائیکل تحویل میں لے لی۔ لاش گھر پہنچنے پرکہرام مچ گیا۔
