سکھر (نمائندہ جسارت) سکھر کے تھانہ تماچانی کی حدود باگڑجی لنک روڈ کے قریب پولیس اور ڈاکوؤں کے سکھیو تیغانی گروہ کے درمیان مقابلے کے نتیجے میں تین ڈاکوئوں کو زخمی حالت میں گرفتار کر کے اسلحہ برآمد کرلیا گیا جبکہ دو ڈاکو فرار ہوگئے۔ ایس ایس پی سکھر عرفان علی سموں کے مطابق سکھیو تیغانی گروہ کے گرفتار زخمی ڈاکو شہید انسپکٹر راؤ شفیع اللہ کی شہادت میں بھی ملوث تھے،گرفتار زخمی ڈاکوؤں کی شناخت ممتاز تیغانی، دریا خان تیغانی اور یاسین تیغانی کے نام سے ہوئی ہے، زخمی ڈاکو گڑھی تیگو کے علاقے سے شکارپور کی طرف منتقل ہو رہے تھے کہ تماچانی کے قریب پولیس کو دیکھتے ہی ڈاکوؤں نے فائرنگ شروع کردی طویل مقابلے اور فائرنگ کے نتیجے میں سکھیو تیغانی گینگ کے تین کارندوں کو زخمی حالت میں گرفتار کرلیا گیا، گرفتار ڈاکو شہید انسپکٹر راؤ شفیع اللہ پر حملے میں ملوث تھے، شہید انسپکٹر راؤ شفیع اللہ ایک سال قبل گڑھی تیگو کے علاقے میں ڈاکوؤں سے مقابلے کے دوران شہید ہوگئے تھے، گرفتار ڈاکو اغواء برائے تاوان، قتل، ڈکیتی، چوری سمیت دیگر سنگین جرائم میں سکھر شکارپور سمیت دیگر اضلاع کی پولیس کو مطلوب تھے۔ ڈاکوؤں کے قبضے سے دو ٹی ٹی پستول میگزین اور گولیاں برآمد کی گئی ہیں۔ زخمی ڈاکو کو سول اسپتال منتقل کردیا گیا، گرفتار ڈاکو کا کرمنل ریکارڈ دیگر اضلاع سے بھی معلوم کیا جا رہا ہے۔
