لاہور:اپوزیشن لیڈر شہباز شریف نے سرکاری ملازمین کی تنخواہوں میں کم ازکم 10 فیصد اضافے کا مطالبہ کردیا۔
قائد حزب اختلاف ومسلم لیگ ن کے صدر شہباز شریف نے سرکاری ملازمین کی تنخواہوں میں کم ازکم 10 فیصد اضافے کا مطالبہ کرتے ہوئے کہا ہے کہ سرکاری ملازمین بالخصوص کم اسکیل کے ملازمین کی تنخواہوں میں اضافہ نہ کرنا قبول نہیں۔
شہباز شریف نے کہا کہ کسانوں کی مدد کےلیے کسی پروگرام کا بجٹ میں ذکر تک نہیں، حکومت کسان اور زراعت کیلئے اقدامات میں بھی بری طرح ناکام ہوئی ہے، زرعی شعبہ 2.9 فیصد کمی کا شکار ہے،کسانوں کو رعایتیں کب دیں گے؟
اپوزیشن لیڈر نے کہا کہ منہگائی ہر حد پار کر چکی ہے، صحت کےاخراجات بڑھ چکے ہیں، روز گارملنے اور غربت کم ہونے کےاقدامات دکھائی نہیں دیتے، سرکاری شعبے کے ترقیاتی اخراجات اور منصوبے کہاں ہیں؟ ان حالات میں سرکاری ملازمین کی تنخواہ نہ بڑھانا نا انصافی نہیں تو اور کیا ہے؟
شہباز شریف کا مزید کہنا تھا کہ ن لیگ نے اپنے دور میں سرکاری ملازمین کو ہاؤسنگ الاونسز اور دیگر مراعات فراہم کیں، ہرسال سرکاری ملازمین کی تنخواہوں میں اضافہ کیا۔
