کورونا وائرس سے ڈرنے کی بجائے اﷲ سے ڈریں، چودھری شجاعت حسین

لاہور (نمائندہ جسارت) پاکستان مسلم لیگ کے صدر و سابق وزیراعظم چودھری شجاعت حسین نے کہا ہے کہ مزدوری کرنے والوں کے ساتھ ساتھ اپنے ملازمین اور اپنے اردگرد جتنے غریب اور مستحق لوگ ہیں ان کو ڈھونڈیں اور ان کو کھانا دیا کریں۔ اپنے ایسے رشتہ دار اور سفید پوش لوگوں کی مدد کریں جو کسی کے آگے ہاتھ نہیں پھیلا سکتے۔ بدھ کو جاری کردہ اپنے ایک بیان میں انہوں نے کہا کہ میرے اور تمام لوگوںکےلیے یہ واقعی لمحہ فکریہ ہے۔ کورونا وائرس سے ڈرنے کی بجائے اﷲ سے ڈریں۔ اس وباءسے بچنے کےلیے اﷲ کو راضی کریں اور حضور کے بتائے ہوئے طریقے پر اپنی زندگی گزاریں، جب اﷲ راضی ہوتا ہے تب ہی معجزات ہوتے ہیں، اس کی مثال میری اپنی زندگی ہے، میرا ایمان ہے کہ اﷲ راضی ہے تو سب کچھ ٹھیک ہو جاتا ہے۔ چودھری شجاعت حسین نے کہا کہ میں بار بار سب کو یہی تاکید کر رہا ہوں کہ یہ وائرس اﷲ تعالیٰ کی طرف سے وارننگ ہے، ہم سب کو اپنے گریبان میں جھانک کر اپنی غلطیوں کا احساس کر کے اﷲ تعالیٰ سے معافی مانگنی چاہیے۔ انہوں نے کہا کہ یہ سمجھنے کی بات ہے کہ پوری دنیا میں طاقت کا معیار بدل چکا ہے، ایٹم بم اور میزائل اس وائرس کو نہیں مار سکتے۔ طاقتور ہونے کے دعوے دھرے کے دھرے رہ چکے ہیں، میرا اس بات پر یقین اور پختہ ہو گیا ہے کہ دوا کے ساتھ ساتھ دعا کا ہونا بہت ضروری ہے کیونکہ اگر اﷲ راضی ہے تو سب کچھ ٹھیک ہو جاتا ہے۔