حیدرآباد(اسٹاف رپورٹر)پاکستان پیپلزپارٹی حیدرآباد کے سینئر رہنما عبدالمنان صدیقی نے اپنے بیان میں کہا ہے کہ مخالفین کی طرف سے پاکستان پیپلزپارٹی کے شریک چیئرمین و سابق صدرآصف علی زرداری کی بیماری کے متعلق غلط افواہوں کے ذریعے ورکروں اور عوام میں مایوسی پھیلانے کی ناکام کوشش کی جا رہی ہے ، جس صدر نے 1973ء کے متفقہ آئین کو اصلی شکل میں بحال کیااوراپنے اختیارات پارلیمنٹ کو سونپ کر انہیں مکمل پاورفل بنایا ، جس نے ہمیشہ ملک کی مضبوطی وترقی اور عوام کی خوشحالی کیلیے جدوجہد کی ، ایسی عظیم شخصیت کیلیے ایسی بے بنیاد افواہیں وہی پھیلاسکتے ہیں جواس ملک اور عوام کے بدخواہ اور پارلیمنٹ کی بالادستی پر یقین نہ رکھتے ہوں، عوام ایسے ملک دشمن عناصر کی اس گھٹیا اورغلط پروپیگنڈے پر دھیان نہ دیں۔انہوں نے ورکروں اور مقامی عہدیداروں کو ہدایت کی کہ وہ اپنے علاقوں میں عوام کو اس سازش کے متعلق آگاہ کریں اور انہیں بتائیں کہ آپ کے ہر دلعزیز قائد کی صحت اللہ پاک کے کرم سے دن بدن بہتر ہوتی جا رہی ہے، ان شاء اللہ وہ عید کی خوشیاں اپنی عوام کے ساتھ منائیں گے۔
