لاڑکانہ(نمائندہ جسارت) لاڑکانہ پولیس نے موٹرسائیکل چوروں کی گینگ کے دو کارندوں کو اسلحہ سمیت گرفتار کرکے چوری شدہ چار موٹرسائیکلیں برآمد کرلی ہیں۔اے ایس پی لاڑکانہ رضوان طارق کی گیریلو تھانے پر پریس کانفرنس کرتے ہوئے بتایا کہ ایس ایس پی مسعود احمد بنگش کی خصوصی ہدایات پر ایس ایچ او گیریلو انسپکٹر امداد علی ہلیو نے موٹرسائیکل چوروں کی گینگ کے خلاف کامیاب کارروائی کرتے ہوئے دو ملزمان ایاز پنہور اور علی حسن برڑو کو گرفتار کرلیا ہے جن سے چوری شدہ چار موٹر سائیکلیں برآمد کرلی گئی ہیں جبکہ ملزمان سے ٹی ٹی پستول بھی برآمد ہوا ہے۔انہوں نے بتایا کہ ملزمان کے خلاف مقدمات درج کرکے برآمد کی گئی موٹرسائیکلیں اصل مالکان کے حوالے کردی گئیں ہیں جن میں عبدالقدیر ابڑو، سید کاشف علی شاہ، عبدالرشید سومرو اور یاسین گوپانگ شامل ہیں۔ان کا مزید کہنا تھا کہ گرفتار ملزمان سے ابتدائی تفتیش کا سلسلہ جاری ہے جن کا مزید کرمنل رکارڈ بھی حاصل کیا جارہا ہے۔
