لاڑکانہ(نمائندہ جسارت) لاڑکانہ شہر کے تھانہ ولید کی حد لب مہران روڈ پر راہ گیر کو بچاتے ہوئے موٹرسائیکل سلپ ہونے کی وجہ سے لاک ڈائون ڈیوٹی پر تعینات بنگل دیرو کا رہائشی 45 سالہ پولیس اہلکار محمد علی بھٹو زخمی ہوگیا جسے دیگر اہلکاروں نے زخمی حالت میں چانڈکا اسپتال کے شعبہ حادثات منتقل کیا جہاں انہیں طبی امداد دی گئی۔ اس موقع پر زخمی اہلکار نے بتایا کہ لاک ڈائون ڈیوٹی کے دوران راہ گیر کو بچاتے ہوئے موٹرسائیکل سے گر کر سر اور پاؤں پر چونٹیں آئیں جبکہ ساتھی اہلکاروں نے مجھے علاج کے لیے اسپتال منتقل کردیا ہے۔ دوسری جانب ایس ایس پی لاڑکانہ مسعود احمد بنگش کی ہدایات پر لاڑکانہ پولیس نے جرائم پیشہ افراد کے خلاف کارروائی کرتے ہوئے 5 مطلوب ملزمان کو گرفتار کرکے اسلحہ برآمد کرلیا۔ رتودیر پولیس نے ملزم انور لولائی کو پستول اور گولیوں سمیت، فتح پور پولیس نے تین روپوش ملزمان شہمیر ناریجو، عزیزاللہ اور عبداللہ ناریجو کو جبکہ سول لائن پولیس نے ملزم شاہد چانڈیو کو روالور اور گولیوں سمیت گرفتار کرلیا ہے۔پولیس کے مطابق گرفتار ملزمان کے خلاف ایسے مقدمات درج کرکے تفتیش شروع کردی گئی ہے۔
