لاڑکانہ (نمائندہ جسارت) لاڑکانہ کے قریب ماہوٹا تھانہ کی حد دھامراہ روڈ پر تیز رفتار ٹریکٹر اور موٹرسائیکل میں ٹکر کے نتیجے میں موٹرسائیکل سوار گاؤں ہوت خان زنگیجو کا رہائشی سلطان احمد زنگیجو، ان کی اہلیہ شاہ جہان خاتون اور چار ماہ کی بچی کلثوم شدید زخمی ہوئیں، اطلاع پر حد کے تھانہ کی پولیس نے پہنچ کر ٹریکٹر تحویل میں لیتے ہوئے ڈرائیور کو گرفتار کرلیا۔ بعد ازاں زخمیوں کو علاج کے لیے چانڈکا اسپتال کے شعبہ حادثات منتقل کیا جہاں زخموں کے تاب نہ لاتے ہوئے دوران علاج شاہ جہان خاتون اور ان کی چار ماہ کی بیٹی کلثوم دم توڑ گئیں جبکہ ضروری کارروائی کے بعد لاشیں ورثا کے حوالے کی گئیں۔ لاڑکانہ کے علاقے نوڈیرو میں پولیس نے سگریٹ چوری میں 10 سالہ بچے پرویز گوپانگ کو گرفتار کرلیا جبکہ گرفتار بچے نے مارپیٹ کے بعد چوری کا اعتراف کرلیا پولیس نے چوری شدہ سگریٹ خریدنے کے الزام پر پولیس نے تین دکانداروں کو بھی گرفتار کرلیا، تاہم دکانداروں کی گرفتاری پر تھانے پر بچہ اپنے بیان سے مکر گیا۔ اس حوالے سے ایس ایچ او تھانہ نوڈیرو گلزار ابڑو نے رابطہ کرنے پر بتایا کہ بچے کو گڑھی خدا بخش بھٹو کے رہائشی علی دوست لغاری نے پکڑ کر پولیس کے حوالے کیا ہے۔ پرویز ابڑو عادی ملزم ہے، چوری کرتا رہتا ہے۔ بچے کے لواحقین کو طلب کیا ہے بات کر کے بچہ ان کے حوالے کیا جائے گا۔ ایس ایس پی لاڑکانہ مسعود احمد بنگش نے فرائض میں غفلت برتنے پر تھانہ نوڈیرو کے ہیڈ محرر نذیر حسین سندیلو کو معطل کرکے لائن رپورٹ کرنے کے احکامات جاری کردیے ہیں۔ ایس ایس پی کے مطابق پولیس افسران و اہلکار اپنی ڈیوٹیاں بہتر طریقے سے سر انجام دیں بصورت دیگر غفلت ثابت ہونے پر سخت کارروائی کی جائے گی۔
