راولپنڈی/لاہور (اے پی پی+نمائندہ جسارت) پاک فوج کا تربیتی طیارہ مشاق گجرات کے قریب گر کر تباہ ہوگیا ، حادثے میں دونوں پائلٹ شہید ہوگئے۔ پاک فوج کے شعبہ تعلقات عامہ ( آئی ایس پی آر) کے مطابق پاک فوج کا تربیتی طیارہ مشاق معمول کی تربیتی پرواز پر تھاکہ گجرات کے قریب گر کر تباہ ہوگیا ہے۔ حادثے میں دونوں پائلٹ شہید ہوگئے، شہید ہونے والوں میں انسٹرکٹرپائلٹ میجر عمر اور تربیتی پائلٹ لیفٹیننٹ فیضان شامل ہیں، میجر عمر کا تعلق گجرات اور لیفٹیننٹ فیضان کا تعلق کلرکہار چکوال سے ہے۔دریں اثنا صدر مملکت ڈاکٹر عارف علوی ، پاک فضائیہ کے سربراہ ائر چیف مارشل مجاہد انور خان،امیر جماعت اسلامی پاکستان سینیٹر سراج الحق، سیکرٹری جنرل امیر العظیم اور نائب امیر لیاقت بلوچ نے گجرات میں تربیتی طیارے کے حادثے پر افسوس کا اظہار کیاہے۔ تمام رہنمائوں نے حادثے میں شہید ہونے والے میجر عمر اور لیفٹیننٹ فیضان کے لواحقین سے گہری ہمدردی اور تعزیت کا اظہار کرتے ہوئے شہدا کے لیے بلندی درجات اور پسماندگان کے لیے صبرجمیل کی دعا کی ہے۔
