واشنگٹن: کورونا وائرس نے چین، اٹلی اور اسپین کے بعد امریکا میں تباہی مچادی جہاں ایک ہی روز 1700 سے ہلاکتیں ریکارڈ کی گئی ہیں۔
امریکی میڈیا کے مطابق امریکا بھر میں کورونا سے 1736 ہلاکتیں ہوئیں جن میں سے صرف نیویارک میں ہی 736 ہلاکتیں رپورٹ ہوئیں جو اب تک دنیا بھر میں کورونا سے ایک روز میں ہونےوالی ریکارڈ ہلاکتیں ہیں۔
اس سے قبل امریکا میں 4 اپریل کو ایک ہی دن میں 1300 سے زائد ہلاکتیں ریکارڈ کی گئیں تھیں۔
امریکا میں اب تک کورونا وائرس سے 12 ہزار 857 ہلاکتیں ہوچکی ہیں جبکہ تقریباً 4 لاکھ افراد کورونا وائرس سےمتاثر ہیں جودنیا میں اس وقت کورونا کے کیسز کی سب سے زیادہ تعداد ہے۔
امریکی ریاست نیویارک میں اس وقت کورونا سے سب سے زیادہ متاثر ہے جہاں ہلاکتوں کی تعداد 5800 سےبھی زیادہ ہے۔
نیویارک کے گورنر اینڈریو کومو کا کہنا ہےکہ ریاست میں وبائی مرض اپنے عروج پر پہنچ چکا ہے، انہوں نے شہریوں سے گھروں میں رہنے، اجتماعات میں شرکت سے گریز اور سماجی فاصلے رکھنے کی اپیل کی ہے۔
کورونا سے امریکی مقامی گلوکار جون پرائن بھی ہلاک ہوگئے جس کی تصدیق ان کے اہلخانہ کی جانب سے کی گئی جبکہ گلوکار کی اہلیہ بھی کورونا وائرس میں مبتلا ہیں۔
دوسری جانب ٹرمپ نے بھی امریکا میں کورونا وائرس کے کیسز سب سے زیادہ ہونے کے خدشات ظاہر کیے ہیں۔
