حیدرآباد (اسٹاف رپورٹر) حیدرآباد کے قریب جیکب آباد سے کراچی جانے والی سکھر ایکسپریس سگنل سسٹم کی خرابی کے باعث پہلے سے کھڑی ہوئی مال گاڑی سے ٹکرا کر ٹریک سے اتر گئی جس کے باعث ٹرین کا ڈرائیور زخمی جبکہ انجن تباہ ہوگیا، مال گاڑی کی بوگی کو بھی نقصان پہنچا ، حادثے کے پیش نظر 3 گھنٹے کے لیے ٹرینوں کی آمد ورفت بھی معطل ہوگئی۔ تفصیلات کے مطابق حیدرآباد کے قریب اللہ ڈینو ساند ریلوے ٹریک پر جیکب آباد سے کراچی جانے والی سکھر ایکسپریس لوپ لائن پر کھڑی مال گاڑی سے ٹکرا گئی حادثہ سگنل سسٹم کی خرابی کے باعث پیش آیا ۔ ذرائع کے مطابق مال گاڑی پہلے سے ٹریک پر موجود تھی جبکہ سگنل گرین تھا تاہم ڈرائیور نے ٹرین کی رفتار کو کنٹرول کیا جس سے باعث ٹرین ہولناک حادثے سے بچ گئی، حادثے میں انجن تباہ ہوگیا جبکہ ڈرائیور بھی زخمی ہوا ہے ۔ حادثے میں مال کے ایک ڈبے کو بھی نقصان پہنچا ہے ۔ مال گاڑی سے ٹکرانے کے بعد ٹرین ٹریک سے اترگئی، خوش قسمتی سے مسافر محفوظ رہے ۔ حادثے کی اطلاع ملتے ہی امداد ٹیمیں پہنچ گئیں اور ٹریک کی بحالی کا کام شروع کردیا ۔ 3 گھنٹے سے 4 گھنٹے کی کوشش کے بعد ٹریک بحال کرایا گیا اس دوران ڈاؤن ٹریک پر آنے والی گاڑیوں کو مختلف ٹنڈو آدم ودیگر اسٹیشنوں پر روک لیا گیا تھا۔
