کورونا سے متعلق عوام میںخوف وہراس حکومت کی نااہلی سے پھیلا ،سراج الحق

کراچی(نمائندہ جسارت)امیر جماعت اسلامی پاکستان سینیٹر سراج الحق نے کہاہے کہ کورونا سے خوف زدہ ہونے کے بجائے عوام اللہ سے رجوع اور توبہ و استغفار کو اپنا معمول بنائیں۔عوام کے اندر زیادہ خوف و ہراس حکومت کی نااہلی اور بے خبری کی وجہ سے پھیلا ہے، حکومت وعظ و نصیحت کے بجائے کورونا سے بچائو کے لیے عملی اقدامات پر فوکس کرے۔ اب تک کی صورتحال سے واضح ہو گیاہے کہ مرکزی و صوبائی حکومتیں کسی ناگہانی آفت سے نمٹنے کی صلاحیت نہیں رکھتیں۔ بہت سی بیماریوں سے دنیا بھر میں روزانہ ہزاروں لوگ لقمہ اجل بن جاتے ہیں مگر کورونا کا اتنا خوف و ہراس پھیلا دیا گیاہے کہ دنیا کے ہر ملک میں مرنے والوں کی تعداد دن میں درجنوں بار بتائی جاتی ہے۔ عوام احتیاطی تدابیر پر عمل کریں ، باوضو رہیں ، 5 وقت نماز کے بعد اللہ تعالیٰ سے دعا و استغفار کریں۔ حکومت ہر چھوٹے بڑے اسپتال میں کورونا کی تشخیص اور علاج کا انتظام کرے صرف چند بڑے شہروں میں علاج کی سہولت دینا چھوٹے شہروں اور دیہات میں رہنے والے کروڑوں عوام نظر انداز کرنے کے مترادف ہے۔ ان خیالات کا اظہار انہوںنے مسجد قبا میں جماعت اسلامی سندھ کے ذمے داران کے اجلاس سے خطاب کرتے ہوئے کیا۔ اجلاس سے جماعت اسلامی سندھ کے امیر محمد حسین محنتی نے بھی خطاب کیا جبکہ الخدمت سندھ کے صدرڈاکٹر سیدتبسم جعفری،ناظم عمومی محمد دین منصوری اورسیکرٹری اطلاعات مجاہد چنا بھی موجود تھے۔ انہوں نے کہاکہ قدرتی آفات اور وبائیں انسانوں کو اپنے خالق کی طرف رجوع کرنے کا پیغام دیتی ہیں۔ اللہ تعالیٰ انسانوں کو متوجہ کرتے ہوئے فرماتاہے کہ اے انسان تجھے جو بھلائی بھی حاصل ہوتی ہے وہ اللہ کی عنایت سے ہوتی ہے اور جو مصیبت آتی ہے وہ تیرے اپنے اعمال کی بدولت آتی ہے۔ اسی طرح اللہ تعالیٰ ہی بیماروںکو شفا دیتاہے۔ انہوںنے کہاکہ اس وقت عالم اسلام کے ساتھ ساتھ اپنی طاقت کے گھمنڈ اور سائنسی ترقی کے زعم میںمبتلا دنیا کی ترقی یافتہ قوموں کو بھی اللہ تعالیٰ کے سامنے جھکنا اور اس کے اقتدار و اختیار اور حاکمیت کو تسلیم کرنا ہوگا۔ سینیٹر سراج الحق نے کہاکہ حکومت کی طرف سے کورونا وائرس کی تشخیص ، علاج اور عوامی آگاہی کے حوالے سے نااہلی کا مظاہرہ دیکھنے میں آرہاہے۔ حکومت خود اعتراف کر رہی ہے کہ اب تک سامنے آنے والے کیسز وہ ہیں جو مختلف ممالک سے پاکستان میں پہنچے ہیں لیکن اب تک بھی حکومت کورونا سے متاثر لوگوں کی ملک میں آمد کو روک سکی ہے نہ اسکریننگ کا بااعتماد نظام قائم کیا جاسکا ہے۔ انہوںنے کہاکہ عوام کے اندر زیادہ خوف و ہراس حکومت کی نااہلی اور بے خبری کی وجہ سے پھیلا ہے۔ وفاق اور صوبے ایک دوسرے پر نااہلی کا الزام لگا رہے ہیں اور توبہ و استغفار اور عوام کو وبا سے بچانے کے لیے عملی اقدامات کے بجائے دوسروں کو مورد الزام ٹھیرانے میں لگے ہوئے ہیں۔