صدرعارف علوی اور شاہ محمود چین پہنچ گئے، کئی یادداشتوں پردستخط متوقع

بیجنگ(اے پی پی)صدر مملکت ڈاکٹر عارف علوی کا بیجنگ پہنچنے پر چین کے وزیر زراعت و دیہی امور ہان چنگ فو، چین میں پاکستانی سفیر نغمانہ عالمگیر ہاشمی اور دیگر چینی اور پاکستانی سفارتخانے کے حکام نے استقبال کیا اور چین کی پیپلز لبریشن آرمی کے چاق چوبند دستے نے گارڈ آف آنر پیش کیا۔ صدر مملکت ڈاکٹر عارف علوی چین کے صدر شی جن پنگ اور وزیراعظم لی چیانگ اور دیگر چینی رہنمائوں سے علیحدہ ملاقات کریں گے۔ صدر ڈاکٹر عارف علوی چینی صدر شی جن پنگ کی دعوت پر وفد کے ساتھ یہ دورہ کر رہے ہیں۔ صدر مملکت کے ساتھ پاکستانی وفد میں وزیر خارجہ شاہ محمود قریشی، وزیر منصوبہ بندی ترقی و خصوصی اقدامات اسد عمر اور سینئر حکام شامل ہیں۔ توقع ہے کہ دورے کے دوران مفاہمت کی متعدد یادداشتوں پر دستخط کیے جائیں گے۔ صدر مملکت ڈاکٹر عارف علوی کا چین کا یہ پہلا دورہ ہے جس کا خصوصی طور پر مقصد کورونا وائرس (کوویڈ۔19) کے خلاف چین کی حکومت اور عوام کے ساتھ بھرپور حمایت اور یکجہتی کا اظہار کرناہے۔یہ دورہ دونوں مضبوط دوست ملکوں کے درمیان تاریخی آزمودہ دوستی اور اعتماد کے رشتوں کو مزید مستحکم بنانے کے لیے اہم کردار ادا کرے گا۔یہ دورہ دونوں ملکوں کی قیادت کو دوطرفہ، علاقائی اور عالمی ایشوز کا جائزہ لینے اور خطے میں اور اس کے باہر امن، خوشحالی اور ترقی کے فروغ کے مشترکہ اہداف پر پیشرفت کا موقع فراہم کرے گا۔