لاڑکانہ (نمائندہ جسارت) لاڑکانہ پولیس نے مبینہ مقابلے میں چھے ملزمان کو زخمی حالت میں گرفتار کرنے کا دعویٰ کردیا، زخمی ملزمان کی جانب سے پولیس پر الزام عائد کیا گیا ہے کہ انہیں گھر سے پکڑ کر مقابلے میں زخمی کیا گیا ہے، لاڑکانہ پولیس کے اعلامیہ کے مطابق لاڑکانہ پولیس نے مقابلہ میں 6 ملزمان کو زخمی حالت میں اسلحہ، چھینی ہوئی موٹر سائیکل اور موبائل فون سمیت گرفتار کرلیا ہے۔ گرفتار ملزمان کی شناخت خدا بخش عرف خدو جلبانی، سدھیر چانڈیو، سجاد بھٹو، سید محسن شاہ، الطاف لاشاری اور منصور تنیو کے طورپر ہوئی ہے جبکہ فرار ملزمان کی گرفتاریوں کے لیے سرچ آپریشن بھی کیا گیا ہے۔ پولیس نے مزید بتایا کہ زخمی حالت میں گرفتار ملزمان کو اسپتال منتقل کیا گیا ہے۔ مقابلوں کے دوران گرفتار ہونے والے ملزمان ڈکیتیوں، لوٹ مار اور چوریوں جیسے کئی مقدمات میں ملوث ہیں۔ دوسری جانب زخمی حالت میں اسپتال لائے گئے خدا بخش و دیگر کا کہنا تھا کہ ہمیں اپنے گھروں سے پکڑ کر مختلف مقامات پر لے جاکر پولیس مقابلے میں زخمی کیا گیا ہے۔ انہوں نے مطالبہ کیا کہ تمام تر معاملے کی شفاف تحقیقات کرکے مقابلے میں ملوث پولیس افسران و اہلکاروں کیخلاف کارروائی کی جائے۔ دوسری جانب ایس ایس پی لاڑکانہ مسعود احمد بنگش کی طرف سے پولیس پارٹیز کے لیے شاباشوں کے پیغامات جاری کیے گئے ہیں۔
