=لاہور: پاکستان سپر لیگ میں آج کوئٹہ گلیڈی ایٹرز کو ملتان سلطانز کا چیلنج درپیش ہوگا جبکہ فائنل فور تک رسائی کی امیدیں باقی رکھنے کیلیےفتح سے کم کچھ درکار نہیں۔
پاکستان سپرلیگ فائیو میں آج کوئٹہ گلیڈی ایٹرز کو ملتان سلطان کا چیلنج کا درپیش ہوگا ،میچ 7بجے قذافی اسٹیڈیم لاہور میں کھیلا جائے گا، شکستوں کے گرداب میں پھنسی کوئٹہ گلیڈی ایٹرز کی ٹیم کو بقا کی جنگ لڑنی ہے،سرفراز احمد کی قیادت میں ٹیم نے اب تک 8میچز میں صرف 3جیتے ہیں،5 میں اسے ناکامی کا منہ دیکھنا پڑا ہے ،6پوائنٹس حاصل کرنے کے بعد فائنل فور مرحلے تک رسائی کی موہوم سی امید باقی رکھنے کیلیے اسے اگلے دونوں مقابلوں میں فتح کی ضرورت ہے۔
لاہور قلندرز کیخلاف گزشتہ میچ میں کوئٹہ گلیڈی ایٹرز 100کا مجموعہ بھی حاصل نہیں کرپائے تھے، شین واٹسن اور جیسن رائے کی کارکردگی میں تسلسل نہیں،احمد شہزاد مسلسل ناکام ہیں، 2اننگز کے بعد جارح مزاج بیٹسمین اعظم خان کا بیٹ بھی خاموش ہے،سرفراز احمد بھی ناکامی کا شکار ہیں۔
ٹیم کیلیے آل راؤنڈرز محمد نواز اور بین کٹنگ کی پرفارمنس اہمیت کی حامل ہے،نسیم شاہ کی خدمات سے محرومی کے بعد پیسرز سہیل خان اور محمد حسنین کو سخت محنت کرنا ہوگی،فواد احمد اور زاہد محمود کی اسپن بولنگ حریف کیلیے مشکلات پیدا کرسکتی ہے۔
دوسری جانب ملتان سلطانز نے 7میچز میں 5فتوحات پائیں، ایک شکست اور ایک بے نتیجہ مقابلے کی مدد سے ٹیم نے11پوائنٹس جوڑ کر فائنل فور مرحلے میں جگہ پکی کرلی ہے،اوپنرز جیمز ونس اور ذیشان اشرف اچھی فارم میں ہیں،مڈل آرڈر میں معین علی، کپتان شان مسعود، رلی روسو اور خوشدل شاہ بڑے اسکور کی راہ ہموار کرسکتے ہیں،شاہد آفریدی نے قذافی اسٹیڈیم میں بارش کی وجہ سے نامکمل رہنے والے میچ میں فارم کی جھلک دکھائی تھی۔
سہیل تنویر ٹی 20 کے بہترین بولرز میں شمار ہوتے ہیں،انھیں جنید خان کا ساتھ بھی میسر ہوگا،اسپن کے شعبے میں عمران طاہر جیسا بڑا نام موجود ہے۔
دوسری جانب کوئٹہ اور ملتان کا میچ بارش سے متاثر ہونے کا امکان ہے۔
