ٹھٹھہ، سجاول (نمائندگان جسارت) ایس ایس پی سہائی عزیز تالپور کی ہدایات پر گٹکا فروشوں کیخلاف ٹھٹھہ پولیس کی جاری کارروائیوں کے سلسلے میں خفیہ اطلاع پر ایس ایچ او جھرک عبدالمومن شیخ نے پولیس اسٹاف کے ہمراہ ٹرک کو روک کر تلاشی لی۔ تلاشی کے دوران ٹرک سے بھاری مقدار میں گٹکا میٹریل برآمد کرکے میٹریل سپلائر ملزم انور شیدی کو گرفتار کرلیا۔ گٹکا میٹریل ٹرک نمبر AE 1149 سے 5 بوریاں جس میں 140 کلو سپاری کے علاوہ کتھا، تیار گٹکا پڑیاں، مین پڑیاں برآمد ہوئیں جن کی ٹھٹھہ اور سجاول میں سپلائی ناکام بنادی گئی۔ برآمد میٹریل اور گرفتار ملزم کیخلاف سیکشن 337 J کے تحت مقدمہ درج کردیا۔ اس سلسلے میں ملنے والی معلومات کے مطابق ٹھٹھہ کے چھوٹے بڑے شہروں، گاؤں میں گٹکے کی فروخت میں اضافہ ہورہا ہے اور ان کو چند کرپٹ پولیس افسران کی سرپرستی حاصل ہے۔ سجاول پولیس کا گٹگا، چھالیہ اور سفینہ گٹکا سے بھرے ٹرک پر چھاپا، تاجر سمیت 4 ملزمان گرفتار، مقدمہ درج۔ پولیس کے ترجمان کے مطابق ایس پی سجاول سہائی عزیز تالپور کے سخت احکامات پر گٹکا فروش ڈیلروں کیخلاف کارروائیاں جاری ہیں۔ سجاول پولیس نے خفیہ اطلاع پر رات گئے سجاول بائی پاس روڈ پی ٹی سی ایل ایکسچینج کے نزدیک کامیاب چھاپا مار کارروائی کرکے سجاول شہر کے گٹکا میٹریل ڈیلر شعیب اور دیگر تین کارندوں عثمان کریم بخش بروہی، حاجی شوکت بروہی کو گرفتار کرلیا جبکہ ایک ملزم بین الاضلاع گٹکا میٹریل سپلائر صلاح الدین پٹھان فرار ہوگیا۔ ملزمان کے قبضے سے 30 کٹے گٹگا چورہ، 12 پیکٹ سفینہ گٹکا، ایک ٹویوٹا کار BNN266، ایک ٹرک JTA6517 برآمد کرلیا گیا۔ ملزمان کیخلاف تھانہ سجاول پر مقدمہ درج کردیا گیا ہے۔
