میکسیکو سٹی (جسارت نیوز) اسپین کے شہرہ آفاق ٹینس اسٹار اور ایونٹ کے ٹاپ سیڈڈ رافیل نڈال نے تیسری مرتبہ میکسیکن اوپن ٹینس مینز ٹورنامنٹ جیت لیا۔ انہوں نے مینز سنگلز فائنل میں امریکا کے ٹیلر فریٹز کو شکست دیکر ٹائٹل جیتنے کی ہیٹ ٹرک بھی مکمل کرلی۔ میکسیکو میں جاری ایونٹ میں کھیلے گئے مینز سنگلز فائنل میچ میں ہسپانوی ٹینس اسٹار رافیل نڈال نے انتہائی شاندار کارکردگی کا مظاہرہ کرتے ہوئے امریکا کے حریف کھلاڑی ٹیلر فریٹز کوا سٹریٹ سیٹس میں 6-3 اور 6-2 سے ہرا کر نہ صرف ٹورنامنٹ جیت لیا بلکہ میکسیکن اوپن جیتنے کی ہیٹ ٹرک بھی مکمل کرلی۔ رافیل نڈال نے اس سے قبل 2005ء میں پہلی مرتبہ یہ ٹائٹل اپنے نام کیا تھا اس کے بعد انہوں نے 2013ء میں دوسری مرتبہ میکسیکن اوپن ٹینس ٹورنامنٹ جیت تھا۔
