اسلام آباد (صباح نیوز) پاکستان پیپلز پارٹی کے رہنما قمر زمان کائرہ نے کہا ہے کہ بلاول زرداری کے نواز شریف کے لیے سلیکٹڈ کے لفظ کو عجیب رنگ دے دیا گیا جو افسوسناک ہے‘ ماضی میں ہم ایک دوسرے کے خلاف اس سے بھی تلخ باتیں کرتے رہے ہیں‘ انہی باتوں کا ادراک کرتے ہوئے میثاق جمہوریت میں گئے تھے۔ گزشتہ روز ایک نجی ٹی وی کے پروگرام میں اظہار خیال کرتے ہوئے قمر زمان کائرہ نے کہا کہ بلاول نے جان بوجھ کر نوازشریف کو نشانہ نہیں بنایا‘ نواز شریف کی صحت اب بہتر ہے‘ مسلم لیگ (ن) کی بھی یہی خواہش ہوگی کہ شہباز شریف جلد واپس آجائیں ‘ اگر مجھ سے کوئی پوچھے گا تو یہی کہوں گا کہ اپوزیشن لیڈر کو جلد واپس آنا چاہیے‘ لندن میں نواز شریف کے بیٹے اور خاندان کے دیگر افراد موجود ہیں۔
