اسلام آباد (جسارت نیوز) تجمل اینڈ دلاور عباس میموریل آئی ٹی ایف پاکستان جونیئر ٹینس چیمپئن شپ کا مین رائونڈ پیر کو پی ٹی ایف ٹینس کمپلیکس اسلام آباد میں شروع ہو گیا جس کا افتتاح اسلام آباد ٹینس ایسوسی ایشن کے صدر طارق مرتضیٰ نے کیا۔ اس موقع پر پی ٹی ایف کے سیکرٹری لیفٹیننٹ کرنل (ر) گل رحمن، تمام غیر ملکی کھلاڑی اور کوچز بھی موجود تھے۔ ایونٹ کے پہلے روز بوائز سنگل کے 13 میچوں کا فیصلہ ہوا۔ پی ٹی ایف ٹینس کمپلیکس اسلام آباد میں کھیلے گئے مین ڈرا کے پہلے رائونڈ کے مقابلوں میں چائنیز تائیپے کے چونگ تانگ نے پاکستان کے حذیفہ عبدالرحمن کو 6-2 اور 6-0، ترکمانستان کے برنٹن دورن نے پاکستان کے بلال عاصم کو 6-3 اور 6-1، جاپان کے سوتااومورا نے پاکستان کے سمیع زیب خان کو 6-0 اور 6-0، روس کے نیکیتا نے چائنیز تائیپے کے خونچونگ ہانگ کو 6-2 اور 6-3، پاکستان کے احمد کامل نے برطانیہ کے آغا رحیم کو 6-4 اور 6-1سے شکست دی۔
