لاہور( نمائندہ جسارت) امیر جماعت اسلامی پاکستان سینیٹرسراج الحق نے مقبوضہ کشمیر کے ممتاز بزرگ رہنما اور کل جماعتی حریت کانفرنس کے علیل چیئرمین سید علی گیلانی کی صحت کے لیے عالم اسلام بالخصوص پاکستان اور آزاد کشمیر کے عوام سے دعا کی اپیل کی ہے۔ سینیٹر سراج الحق نے کہا کہ آج ملک بھر میں سید علی گیلانی کی صحت یابی کے لیے خصوصی دعائیں کی جائیں ۔ انہوںنے کہاکہ سید علی گیلانی نے مقبوضہ کشمیر کی آزادی کے لیے عظیم قربانیاں دی ہیں۔ سارا عالم اسلام سید علی گیلانی کی صحت یابی کے لیے آج یقیناًدعا گو ہوگا۔ واضح رہے کہ حریت کانفرنس کے چیئرمین سیدعلی گیلانی کی طبیعت پچھلے 6 ماہ سے خراب ہے اور انہیں حال ہی میں ایس کے آئی ایم ایس اسپتال میں داخل کرایا گیا تھا۔بدھ کی شام سید علی گیلانی کے حوالے سے سوشل میڈیا پر مبہم خبریں پھیلائی جارہی تھیں۔ سید علی گیلانی کو گزشتہ روز سینے میں انفکشن کی وجہ سے تکلیف تھی اور ان کی صحت کافی خراب تھی۔ تاہم ان کی صحت اب پہلے سے بہتر ہے۔
