لاہور( نمائندہ جسارت) نائب امیر جماعت اسلامی پاکستان راشد نسیم نے کہاہے کہ ملک اس وقت جن مسائل کی دلدل میں دھنسا ہواہے ، اس کے اصل مجرم وہ حکمران ہیں جو پارٹیاں بدل کر اقتدار پر قابض ہوتے رہے ۔ موجودہ حکومت بھی پیپلز پارٹی اور مسلم لیگ سمیت سابقہ حکمران پارٹیوں کے لوگوں کو جمع کر کے بنائی گئی ہے ۔ مشرف کابینہ کے آدھے وزیر موجودہ کابینہ میں بیٹھے ہیں ۔ جب تکقرآن و سنت کے احکامات پر عمل کرنے والی دیانتدار قیادت حکومت میں نہیں آتی ، ملکی مسائل حل نہیں ہوسکتے ۔ خلافت کا نظام ہی ہمارے مسائل حل کر سکتاہے ۔ ان خیالات کا اظہار انہوںنے منصورہ میں جاری مرکزی تربیت گاہ کے شرکاء سے خطاب کرتے ہوئے کیا ۔ راشد نسیم نے کہاکہ ملک پر 70 سال سے ایک ہی طبقہ کے لوگ مسلط ہیں ۔ عالمی استعمار کے غلام اور دولت کے پجاری ان حکمرانوں نے ملک و قو م کو طرح طرح کے مسائل اور مشکلات کا اسیر بنا دیاہے ۔ مہنگائی ، بے روزگاری اور تعلیم و صحت کے مسائل نے عوام کی چیخیں نکال دی ہیں ۔ موجودہ حکمرانوں نے غریب سے کھانے کا آخری نوالہ بھی چھین لیاہے ۔عوام کے اندر حکومت کے خلاف سخت بے چینی اور غم و غصہ پایا جارہاہے ۔ نوجوانوں سے روزگار کا وعدہ کر کے انہیں مایوسی کے اندھیروں میں دھکیلا جارہاہے اور اب تک لاکھوں لوگوں سے روزگار چھین لیا گیاہے ۔ راشد نسیم نے کہاکہ اسلامی نظام ہی ملک و ملت کے مسائل کے حل کا ضامن ہے ۔ جب تک خوف خدا رکھنے والی دیانتدار قیادت برسراقتدار نہیں آتی ، مسائل کم ہونے کے بجائے بڑھتے رہیں گے ۔
