(سید وزیر علی قادری)آئی سی سی ورلڈ ٹیسٹ چیمپئن شپ میں شامل پاکستان اور بنگلا دیش کے درمیان 2 ٹیسٹ میچوں پر مشتمل سیریز کا پہلا میچ کا آغازآج سے راولپنڈی میں ہورہا ہے۔ پاکستان نے 10 سال بعد ہوم گراؤنڈ پرپہلا ٹیسٹ میچ بھی چند ماہ قبل اسی مقام پر کھیلا تھا۔پاکستان اور سری لنکا کے درمیان پنڈی کرکٹ اسٹیڈیم راولپنڈی میں کھیلا گیا میچ بارش کے باعث ڈرا ہوگیا مگر موسم کی خرابی کے باعث ایک متوقع ڈرا میچ دیکھنے کے لیے، شائقینِ کرکٹ کی بڑی تعداد نے میچ کے5ویں روز اسٹیڈیم کا رخ کیا تھا۔اْس روز ہر گیند پر شور مچانے والے تماشائیوں نے میزبان ٹیم کی بیٹنگ لائن اپ کی ریڑھ کی ہڈی سمجھے جانے والے بابر اعظم کا بھرپور استقبال کیا تھا۔ چوتھے نمبر پر بیٹنگ کے لیے میدان میں اترنے والے بابراعظم کے ڈریسنگ روم سے کریز تک پہنچنے تک ہر طرف ”بابر، بابر” کی گونج تھی۔ان لمحات کے بارے میں بابر اعظم کاکہنا ہے کہ اس وقت ان کے جذبات ناقابل بیان تھے۔ انہوں نے کہا کہ وہ اپنے کیرئیر میں یہ آوازیں سننے کے لیے بیتاب تھے۔ بابر اعظم نے کہا کہ اسٹیڈیم میں موجود تماشائیوں سے اپنے نام کی پکار سنی تو کریز پر پہنچنے سے پہلے ہی فیصلہ کرچکا تھا کہ آج 100 فیصد کارکردگی کا مظاہرہ کروں گا۔مڈل آرڈر بیٹسمین نے کہا کہ یہ وہ لمحات ہیں جو ہوم سیریز، بیرون ملک کھیلنے کے باعث ہمیں میسر نہیں تھے۔ بابر اعظم نے کہا کہ یہ تماشائیوں کا جوش ہی تھا جس نے انہیں میچ میں سنچری اسکور کرنے کے لیے ہمت بندھائی۔
