لاڑکانہ (نمائندہ جسارت) لاڑکانہ میں قائم بیگم نصرت بھٹو گرلز ڈگری کالج میں اسٹوڈنٹس ویک کے سلسلے میں پیپلز پارٹی کی رکن سندھ اسمبلی ندا کھڑو نے کھیلوں کا افتتاح کیا۔ بعد ازاں انہوں نے ڈاکٹر سکینہ گاد، پرنسپل ثمینہ ابڑو و دیگر کے ہمراہ سائنس و آرٹس نمائش کا دورہ کیا، جہاں طالبات کے ہاتھوں سے بنائے گئے ماڈلز دیکھ کر انہوں نے طالبات کی حوصلہ افزائی کی۔ دوسری جانب کالج میں میوزیکل چیئر، ٹگ آف وار، 100 میٹر ریس، سیک ریس، اسپون گیم و دیگر مقابلوں میں طالبات نے بڑی تعداد میں حصہ لے کر اپنی صلاحیتوں کا بھرپور مظاہرہ کیا۔ اس موقع پر پرنسپل ثمینہ ابڑو کا کہنا تھا کہ کالج میں اسٹوڈنٹس ویک منانے کا مقصد کھیل سمیت دیگر غیر نصابی سرگرمیوں کو شامل کرکے طالبات کی صلاحیتوں کو اجاگر کرنا ہے تاکہ وہ آسانی سے اپنی تعلیم مکمل کرسکیں۔
