ٹھٹھہ (نمائندہ جسارت) سول اسپتال ٹھٹھہ کے سینئر میڈیکل آفیسر کی ٹیم نے سب جیل ٹھٹھہ میں قیدیوں کا میڈیکل اینڈ ڈینٹل چیک اپ کیا۔ سول سرجن سول اسپتال ٹھٹھہ کی جانب سے بنائی گئی میڈیکل ٹیم جس میں سینئر ڈاکٹر حنیف میمن، ڈینٹل سرجن ڈاکٹر شیام کمار، سینئر فزیشن ڈاکٹر جمال حسین جاکھرو اور دوسرے سینئر ڈاکٹروں کی نگرانی میں جوڈیشل لاک اپ ٹھٹھہ میں قیدیوں کا مفت معائنہ کیا گیا۔ اس سلسلے میں فوکل پرسن ڈینٹل ڈپارٹمینٹ سول اسپتال ٹھٹھہ ڈاکٹر شیام کمار نے میڈیا نمائندگان سے بات کرتے ہوئے بتایا کہ جیلوں میں قیدیوں کو صحت و صفائی کے حوالے سے محکمہ صحت سندھ کے احکامات کو مدنظر رکھتے ہوئے ہفت روزہ فری چیک اپ کررہے ہیں، جس میں قیدیوں کو صحت سہولیات کی فراہمی کو یقینی بنایا جارہا ہے۔
