اسلام آباد ( آن لائن) مسلم لیگ (ن) کی ترجمان مریم اورنگزیب نے کہا ہے کہ آٹے کا بحران حکومت کی بدترین نالائقی ہے، عمران خان کی غلط پالیسیوں کی وجہ سے عوام کے لیے 2 وقت کی روٹی مشکل ہوگئی ہے۔ مریم اورنگزیب نے ملک میں آٹے کے بحران پر اظہار تشویش کرتے ہوئے کہا ہے کہ روٹی 15 روپے اور نان 20 روپے کی ہونے کے بعد آٹے کا بحران حکومت کی بدترین نالائقی ہے، عمران خان صاحب آپ نے مکان، دکان، کاروبار اور مزدوری تباہ کرنے کے بعد اب غریبوں کا آٹا بھی بند کر دیا، نئے پاکستان میں آٹا ختم اور تندور بند ہوگیا اور عوام اب لنگر سے روٹی کھائیں؟۔ مریم اورنگزیب کا کہنا تھا کہ 16 ماہ میں گیس 250 فیصد مہنگی ہوگئی یہ افسوسناک اور شرمناک ہے، 16 ماہ پہلے اگر ایک خودکشی ہوجاتی تو آج کروڑوں عوام خود کشی کرنے سے بچ جاتے۔
