کراچی :پاکستان اور بنگلا دیش کے درمیان ٹی 20 سیریز کیلئے ٹکٹوں کی فروخت اور ان کی مالیت کے حوالے سے تفصیلات کا اعلان کردیا۔
تفصیلات کے مطابق پاکستان اور بنگلادیش کے مابین 3 ٹی 20 میچوں پر مشتمل سیریز رواں ماہ 24 ، 25 اور 27 جنوری کو قدافی اسٹیڈیم لاہور میں کھیلے جائیں گے۔ پاکستان کرکٹ بورڈ نے شائقین کی زیادہ سے زیادہ توجہ حاصل کرنے اور میدان کو شائقین کرکٹ سے بھرنے کیلئے قیمتوں میں کمی پراتفاق کرلیا گیاہے ۔
پاکستان اور بنگلادیش کےدرمیان سیریز کے3 ٹی 20 اور ایک ٹیسٹ میچ کیلئے ٹکٹوں کی قیمتوں میں کمی کی گئی ہے۔ پاکستان کرکٹ بورڈ نے عوام خاص طورپر فیملیز کی سہولت اور دلچسپی کومدنظر رکھتے ہوئےآئندہ سیریز کیلئے ٹکٹوں کے نرخ کم کردئیے ہیں۔
پاکستان اور بنگلادش کے مابین ٹی 20 میچز کیلئے ٹکٹوں کی آن لائن بکنگ 18 جنوری کوصبح 10 بجے سے شروع ہوگی۔شائقین کرکٹ آن لائن ٹکٹ بک کرسکتے ہیں ،تاہم ٹی سی ایس کے مقررہ کردہ سینٹرز سے ٹکٹوں کی فروخت 21 جنوری کو صبح 9 بجے سے شروع ہوگی۔
پاک بنگلا دیش 3ٹی 20 میچز کیلئے انضمام الحق، نذر، قائد، امتیاز احمد، ظہیر عباس، حنیف محمد، ماجد خان، عبدالقادر، سعید احمد اور سرفراز نواز انکلوژرز کے ٹکٹ 500 روپے میں دستیاب ہوں گے۔ اے ایچ کاردار، راجاز، جاوید میانداد اورسعید انور انکلوژرز کےٹکٹ کی قیمت 1000 روپےمقررکردی گئی ہے جو سری لنکا کے خلاف سیریز میں 1500 روپےتھی۔
آئندہ سیریز میں عمران خان اورفضل محمود انکلوژرز کےٹکٹ 2000 روپے میں فروخت ہوں گے۔ گزشتہ سیریز میں ان انکلوژرز کے ٹکٹ 3000 روپےمیں دستیاب تھے۔سری لنکا سیریز میں وسیم اکرم اور وقار یونس انکلوژرز کا 5000 روپے میں فروخت ہونے والا ٹکٹ بنگلہ دیش سیریز میں 4000 روپے میں دستیاب ہوگا۔
راولپنڈی میں شیڈول ٹیسٹ میچ 7 تا 11 فروری تک اظہرمحمود، عمران خان، جاوید اختر اور جاوید میانداد انکلوژرز کے ٹکٹ کی قیمت 100 روپے مقرر کی گئی ہے۔ میران بخش، شعیب اختر، سہیل تنویر اور یاسر عرفات انکلوژرز کے ٹکٹ 50 روپے میں دستیاب ہوں گے۔
سیریز میں شامل پہلے ٹیسٹ میچ کیلئےٹکٹوں کی فروخت کا شیڈول بعدمیں جاری کیا جائے گا جبکہ واحد ایک روزہ اور دوسرے ٹیسٹ میچ کیلئےٹکٹوں کی مکمل تفصیلات بھی بعد میں جاری کی جائیں گی۔
دوسری جانب شائقین کرکٹ سے درخواست کی ہےکہ وہ ٹی سی ایس سنٹرز سے ٹکٹ خریدتے وقت قومی شناختی کارڈ اپنے ہمراہ رکھیں۔
پاکستان کرکٹ بورڈ کے کمرشل ڈائریکٹربابر حامدکا کہنا ہے کہ سری لنکا کے خلاف سیریز کے دوران شائقین کرکٹ کا زبردست رجحان دیکھا گیا لہٰذا پی سی بی نے ان کی دلچسپی کے پیش نظربنگلادیش کے خلاف سیریز کیلئےٹکٹوں کے نرخ کم رکھے ہیں۔
کمرشل ڈائریکٹر بابر حامد نے کہا کہ آئندہ چند ہفتے قذافی اسٹیڈیم لاہورمیں بھرپورکرکٹ دیکھنے کوملے گی۔ انہوں نے کہا کہ بنگلادیش کے خلاف ٹی 20 سیریز کے بعد پی ایس ایل 2020 کے 14 میچز بھی لاہور میں ہی ہوں گے۔
بابر حامد نے کہا کہ پی سی بی فینز اورفیملیز کو میچز دیکھنے کے لیے اسٹیڈیم آنے کی دعوت دیتا ہے، یقین ہےکہ شائقین کرکٹ بنگلہ دیش سیریز میں بھرپورجوش وخروش کے ساتھ اسٹیڈیم کا رخ کریں گے۔
یاد رہے کہ پاک بنگلادیش سیریز کے میچز کا ٹاس ڈیڑھ بجے ہوگا جبکہ کھیل کا باقائدہ آغاز 00؛2شروع ہوگا۔
