وفاقی دارالحکومت میں تین مسلح افراد نے ناکہ بندی کے دوران گاڑی کی ٹکر سے دو پولیس اہلکاروں کو زخمی کرتے ہوئے گاڑی چھوڑ کر فرار ہوگئے۔ گاڑی سے بڑی مقدار میں منشیات اور اسلحہ برآمد ہوا ہے۔
تفصیلات کے مطابق سیکٹر جی 13 میں سی آئی اے پولیس کی ناکہ بندی کے دوران ایک مشکوک گاڑی کو روکنے کا اشارہ کیا گیا لیکن گاڑی میں موجود مسلح افراد نے پولیس پر اچانک فائرنگ شروع کر دی۔ مسلح افراد نے گاڑی کو تیز بگاتے ہوئے سامنے کھڑے دو پولیس اہلکاروں کو زخمی کردیا۔
بعد ازاں مسلح افراد گاڑی کو سڑک پر ہی چھوڑ کر فرار ہوگئے۔
پولیس کا کہنا ہے کہ گاڑی میں تین مسلح ملزمان سوار تھے، گاڑی کو شک کی بنیاد پر رکنے کا اشارہ کیا گیا تھا۔
پولیس کے مطابق گاڑی سے 39 غیر ملکی شراب کی بوتلیں، دو پستول اور ایک رائفل، ڈیڑھ کلو ہیروئن، چھ کلو سے زائد چرس اور 35 گرم آئس برآمد ہوئی ہے۔
زخمی پولیس اہلکاروں کو پمز اسپتال منتقل کردیا گیا ہے جبکہ ملزمان کی گرفتاری کے لیے آپریشن شروع کردیا ہے۔
