لاڑکانہ(نمائندہ جسارت) لاڑکانہ میں جامعہ شہید محترمہ بینظیر بھٹو کے ملازمین نے قلم چھوڑ ہڑتال اور دفاتر کی تالابندی کرکے مطالبات کے حق میں 17 ویں روز بھی چانڈکا میڈیکل کالج گیٹ کے سامنے احتجاجی مظاہرہ کرکے دھرنا دیا جہاں ملازمین نے شدید نعرے بازی بھی کی۔ اس موقع پر ملازم رہنماؤں ذوالفقار شر، نور محمد ہلیو، عنایت اللہ جاگیرانی و دیگر کا کہنا تھا کہ جامعہ شہید بے نظیر بھٹو کی انتظامیہ ہمارے مسائل حل کرنے کے بجائے ملازمین پر یونیورسٹی اور رحمت پور تھانوں پر دو جھوٹے مقدمات درج کرکے حراسان کررہی ہے تاکہ ملازمین اپنے حقوق سے دستبردار ہوں لیکن ہم کسی بھی صورت اپنے حقوق سے دستبردار نہیں ہوںگے۔ انہوں نے وزیر اعلیٰ سندھ سے اپیل کی کہ ملازمین کے احتجاج کا نوٹس لے کر تمام مسائل حل کرکے ملازمین پر دائر مقدمات ختم کیے جائیں بصورت دیگر احتجاج کا دائرہ وسیع کریں گے۔
