سکھر (نمائندہ جسارت) کسٹم پولیس سکھر نے کروڑوں روپے مالیت کی بھاری مقدار میں چرس کی اسمگلنگ کی کوشش ناکام بنادی، ڈپٹی کلکٹر کسٹم عمران رسول کے مطابق کسٹم پولیس نے جیکب آباد کے قریب بلوچستان سے پنجاب جانے والے ٹرک کو روکنے کی کوشش کی، تاہم ڈرائیور نے ٹرک کی رفتار بڑھا دی، کسٹم پولیس نے تعاقب کرکے ٹرک کو جالیا۔ شکارپور کے قریب ڈرائیور اور کلینر ٹرک چھوڑ کر فرار ہوگئے۔ ٹرک کی تلاشی کے دوران اعلیٰ کوالٹی کی ایک ٹن چرس برآمد کی گئی۔ برآمد چرس کی مالیت کروڑوں روپے ہے۔ کارروائی کسٹم کلکٹر کی ہدایات پر کی گئی۔
