بدین (نمائندہ جسارت) رواں ماہ پاکستان پیپلز پارٹی کے چیئرمین بلاول زرداری اور وزیراعلیٰ سندھ مراد علی شاہ کی بدین آمد متوقع، تیاریاںجاری۔ پاکستان پیپلز پارٹی کے چیئرمین بلاول زرداری 17 جنوری کو سابق ہاری رہنما شہید فاضل راہو کی برسی کی تقریب میں شرکت کے لیے گولارچی کے شہر راہوکی پہنچیں گے۔ بلاول زرداری کی بدین آمد اور شہید فاضل راہو کی برسی کی تیاریوں کے سلسلے میں صوبائی وزیر زراعت اسماعیل راہو کی صدارت میں شہید فاضل راہو یادگار کمیٹی کے اجلاس میں پروگرام کو حتمی شکل دے کر تیاریاں جاری ہیں جبکہ پارٹی ذرائع کے مطابق وزیر اعلیٰ سندھ سید مراد علی شاہ کی 13 جنوری کو بدین آمد متوقع ہے۔ وزیراعلیٰ سندھ بلاول کی بدین آمد سے قبل منتخب نمائندوں، پارٹی عہدیداروں سے ملاقات کر کے ان کی شکایات اور خدشات کو دور کرنے کے علاوہ کھلی کچہری میں بھی شرکت کریں گے۔ رواں ہفتے بدین ضلع سے تعلق رکھنے والے ارکین اسمبلی اور پارٹی عہدیداروں کے کراچی میں بلاول زرداری اور وزیر اعلیٰ سندھ سے ملاقات اور مشاورتی اجلاس بھی ہوچکے، جن میں مقامی سطح کے اختلافات شکایات اور خدشات زیر غور بھی آئے۔
