ٹھٹھہ (نمائندہ جسارت) پاکستان نیوی کی جانب سے گجو میں ایک روزہ مفت آنکھوں کا کیمپ کا انعقاد کیا گیا، مفت کیمپ میں آئی سائٹ ٹرسٹ اور پاک نیوی کے میڈیکل اسٹاف نے خدمات سرانجام دیں۔ اس سلسلے میں آئی سائٹ ٹرسٹ کے کوآرڈینیٹر ندیم خان نے نمائندہ جسارت سے بات کرتے ہوئے بتایا کہ گجو میں انہوں نے دوسرا کیمپ لگایا ہے، یہاں آنکھوں کے بہت امراض موجود ہیں، جن کو معیاری سہولیات فراہم کررہے ہیں۔ یہ سلسلہ ضروریات کی بنیاد پر آئندہ بھی جاری رہے گا۔ کیمپ میں گجو سمیت دور دراز دیہی علاقوں سے بڑی تعداد میں لوگوں نے آنکھوں کے علاج کی معیاری سہولیات سے فائدہ اٹھایا، جن کا مفت معائنہ، چشمے اور ادویات فراہم کی گئیں، جن مریضوں کو آپریشن کی ضرورت تھی ان کا خالد آئی اسپتال کراچی سے مفت آپریشن کیا جائے گا۔ کیمپ میں پی ٹی آئی رہنما جاوید لطیف میمن، شہناز بلوچ، مراد خان، گل حسن جاکھرو نے خصوصی شرکت کی۔
