کراچی (اسٹاف رپورٹر) سربراہ تنظیم (ایم کیو ایم پاکستان) بحالی کمیٹی ڈاکٹر فاروق ستار نے جنرل(ر) پرویز مشرف کے خلاف آنے والے فیصلے پر گزشتہ روز کراچی پریس کلب میں پریس کانفرنس سے خطاب کرتے ہوئے کہا کہ سابق صدر کے خلاف فیصلہ غیر منصفانہ اور متعصبانہ ہے، فیصلے سے بانیان پاکستان اور 5 کروڑ مہاجروں کی دل آزاری ہوئی ہے، سب سے پہلے پاکستان کا نعرہ لگانے والا آج غدار ہوگیا اور اس کو گھسیٹنے کی بات کی جا رہی ہے۔ فیصلے کے خلاف پریس کلب پر آج ساڑھے 3 بجے احتجاج کیا جائے گا۔ فاروق ستار نے احتجاجی مظاہرے میں فروغ نسیم، ایم کیو ایم پاکستان کے رہنماؤں اور مصطفیٰ کمال کو بھی شرکت کی دعوت دے دی۔ فاروق ستار نے مزید کہا کہ پرویز مشرف کے آبا و اجداد نے ملک بنایا ان کو غدار قرار دے دیا گیا افسوس ناک فیصلہ ہے۔ ججوں کو مناظرے کا چیلنج دیتا ہوں، اگر میں ہار جاؤں تو سیاست چھوڑدوں گا، اگر جج ہار جائیں تو وہ کرسی چھوڑ دیں۔ فیصلے میں عدل کے تقاضے پورے نہیں کیے گئے۔ پرویز مشرف کے آبا و اجداد نے ملک بنایا ان کو غدار قرار دے دیا گیا افسوس ناک فیصلہ ہے۔
