ڈیرہ اسماعیل خان (جسارت نیوز) پاکستان کے سینئر صحافی اور ایشین اسپورٹس جرنلسٹس ایسوسی ایشن کے سیکرٹری جنرل امجد عزیز ملک کی کتاب خیبر پختونخوا اور کرکٹ 70 سال کی تقریب رونمائی آج جرگہ ہال کمشنر آفس ڈیرہ اسماعیل خان میں ہو گی۔ کمشنر ڈیرہ جاوید مروت، ڈی آئی جی ڈیرہ اسماعیل خان امتیاز شاہ، ڈی پی او واحد محمود، رکن صوبائی اسمبلی احمد کنڈی سمیت زندگی کے مختلف شعبوں سے تعلق رکھنے والوں کی بڑی تعداد تقریب میں شرکت کرے گی۔پشاور، سوات اور باجوڑ میں منعقدہ تقریبات کے بعد صوبے میں کرکٹ کھیل سے متعلق تاریخی کتاب کی تقریب رونمائی ڈیرہ اسماعیل خان میں کی جا رہی ہے۔امجد عزیز ملک پاکستان کے واحد ا سپورٹس جرنلسٹ ہیں جنہوں نے کھیلوں سے متعلق 14 کتابیں لکھی ہیں۔ان کی حالیہ کتاب میں صوبہ خیبر پختونخوا سے تعلق رکھنے والے ان کھلاڑیوں سے متعلق تحریر کیا گیا ہے جنہوں نے پاکستان کی جانب سے ٹیسٹ کرکٹ، ون ڈے انٹرنیشنل اور ٹی ٹوئنٹی میچز کھیلے۔واضح رہے کہ امجد عزیز ملک نے 1998 ء میں صوبہ سرحد اور کرکٹ50 سال کے نام سے بھی ایک کتاب لکھی تھی تاہم صوبے سمیت ملک میں کرکٹ کھیل کی بڑھتی ہوئی مقبولیت کے پیش نظر انہوں نے صوبے کی 70 سالہ تاریخ کو ریکارڈز کا حصہ بنا دیا ہے۔
