سائوتھ ایشین گیمز پاکستان نے اسکواش میں طلائی تمغہ جیت لیا

کراچی (اسٹاف رپورٹر)پاکستان نے 13 ویں سائوتھ ایشین گیمز کے اسکواش ٹیم ایونٹ میں طلائی کا تمغہ جیت لیا۔ پاکستان نے بھارت کو 2-1 سے شکست دے کر ٹائٹل اپنے نام کیا۔ منگل کو نیپال کے شہر کھٹمنڈو میں کھیلے گئے اسکو اش ٹیم ایونٹ فائنل کے پہلے میچ میں پاکستان کے طیب اسلم نے بھارت کے ہرندر کو 5-11، 11-6، 11-4 اور 12-10 سے شکست دی۔ دونوں کھلاڑیوں کے درمیان میچ 36 منٹس تک جاری رہا۔ دوسرے میچ میں پاکستان کے عاصم خان کو بھارت کے پردھان کے ہاتھوں 9-11، 11-4، 4-11 ، 11-5 اور 4-11 سے شکست ہوئی۔ دونوں کھلاڑیوں کے درمیان میچ 34 منٹس تک جاری رہا۔ ٹیم ایونٹ کے تیسرے اور فیصلہ کن میچ میں پاکستان کے فرحان محبوب نے بھارت کے ابھی سنگھ کو 11-8، 12-10 اور 11-5 سے ہرا کر کامیابی حاصل کی۔ دونوں کھلاڑیوں کے درمیان میچ 34 منٹس تک جاری رہا۔ اس طرح ایونٹ میں پاکستان نے بھارت کو شکست دے کر طلائی تمغہ اپنے نام کیا۔ قبل ازیں ٹیم ایونٹ کے خواتین ا سکواش مقابلوں میں بھارت نے پاکستان کو 2-1 سے شکست دی۔ اسی طرح مجموعی طور پر خواتین نے ٹیم ایونٹ میں چاندی کاتمغہ حاصل کیا۔