کھٹمنڈو (جسارت نیوز)13ویں سائوتھ ایشین گیمز میں پاکستان کے سعدی عباس نے کراٹے ایونٹ میں طلائی تمغہ جیت لیا، پاکستان کا یہ کراٹے ایونٹ میں مجموعی طور پر تیسرا گولڈ میڈل ہے۔ ظفر اقبال، نصیر احمد، کلثوم اور ثناء کوثر نے چاندی جبکہ ناز گل نے کانسی کا تمغہ اپنے نام کیا۔ نیپال کے دارالحکومت کھٹمنڈو میں سائوتھ ایشین گیمز میں کھیلے گئے کراٹے ایونٹ میں پاکستان نے تیسرا طلائی تمغہ جیت لیا، 75 کلوگرام کیٹگری میں پاکستان کے سعدی عباس نے سونے کا تمغہ اپنے نام کیا۔ ظفر اقبال نے 60 کلوگرام اور نصیر احمد نے 67 کلوگرام کیٹگری میں چاندی کا تمغہ جیتا۔ خواتین مقابلوں میں ثناء کوثر نے 55 کلوگرام اور کلثوم نے 68 کلوگرام میں چاندی کا تمغہ اپنے نام کیا۔ ناز گل نے 61 کلوگرام میں کانسی کا تمغہ جیتا۔ کراٹے ایونٹ میں پاکستان کے مجموعی میڈلز کی تعداد 15 ہوگئی جس میں 3 سونے، 7 چاندی اور 5 کانسی کے تمغے شامل ہیں۔
