ملتان (جسارت نیوز)جنوبی پنجاب کے کرکٹ شائقین کے لئے بڑی خوشخبری،ملتان کرکٹ اسٹیڈیم میں پی ایس ایل کا میلہ سجے گا۔توقع ہے کہ ملتان میں پی ایس ایل کے 5ویں سیزن میں5 میچزکھیلے جائیں گے۔ اس سلسلے میں سکیورٹی کی صورت حال کا جائزہ لینے کے لئے سٹی پولیس آفسیرمحمد زبیردریشک اور ڈپٹی کمشنر ملتان عامر خٹک سے ایسٹرن اسٹار انٹرنیشنل کے غیر ملکی سکیورٹی وفد نے ملاقات کی۔سکیورٹی وفدکی قیادت مسٹر ریجڈکسن اور ڈیوڈ سمینر کر رہے تھے۔ ملاقات میں پاکستان کرکٹ بورڈ کے ڈائریکٹر سکیورٹی انٹرنیشنل کرنل(ر) آصف محمود اور میجر(ر) اظہر عارف, ایس ایس پی کاشف اسلم اور سی ٹی او ہمانصیب بھی موجود تھیں۔ سٹی پولیس آفیسر محمدزبیر دریشک نے کہا کہ پولیس اور انتظامیہ ملتان میں پی ایس ایل میچز کرانے کے لیے مکمل تیار ہے۔پی ایس ایل کے موقع پر سیکیورٹی کے مثالی انتظامات کئے جائیں گے۔انہو ں نے کہا کہ غیر ملکی کھلاڑی ا سٹیٹ گیسٹ کا درجہ رکھتے ہیں۔ پولیس کو سکیورٹی کے لیے تمام اداروں کی بھرپور مدد حاصل ہے۔سکیورٹی انتظامات کو فول پروف بنانے کے لیے فرضی مشق بھی کی جائے گی۔ انہوں نے کہا کہ ا سٹیڈیم کے اندر، پارکنگ ایریا، روٹ اور کھلاڑیوں کی رہائش گاہوں کے اطراف میں بھرپور سکیورٹی انتظامات کئے جائیں گے۔میچوں کے دوران مکمل سکیورٹی اور ٹریفک پلان ترتیب دیا جائے گا۔ضرورت پڑنے پر ڈویڑن کے دوسرے اضلاع سے بھی پولیس کو طلب کیا جائے گا۔ ڈپٹی کمشنر ملتان عامر خٹک نے کہا کہ پاکستان سپر لیگ میچز کا انعقاد ملتان کے لئے اعزاز ہے۔ اس خطے کے لوگوں میں پی ایس ایل میچز کے بارے بہت جوش و خروش پایا جاتا ہے۔ ملتان کی دھرتی نے نامور کرکٹر پیدا کئے ہیں۔غیر ملکی وفد نے سکیورٹی کے حوالے سے اطمینان کا اظہار کیا اور ا سٹیڈیم کا بھی دورہ کیا۔ملتان میں پی ایس ایل کے 5 میچز کھیلے جانے کا امکان ہے۔
