اسلام آباد (اے پی پی) وفاقی وزیر مواصلات و پوسٹل سروسز مراد سعید نے کہا ہے کہ پیپلز پارٹی کے یوم تاسیس پر بلاول نے نانا کے نظریات پر فاتحہ پڑھتے ہوئے ’’ابو اور انکی کرپشن بچانے‘‘ کی جدوجہد کا عزم کیا ، بلاول کی تقریر پر ردعمل دیتے ہوئے انہوں نے کہا کہ بلاول کو پیپلزپارٹی کی قیادت اس لیے دی کہ وہ بھٹوازم سے جان چھڑوا کر پورا زور انکی کرپشن اور ذات کے دفاع پر لگائیں۔ وفاقی وزیر نے کہا کہ بلاول نے مولوی صاحب کے ساتھ ملکر کشمیر کو عالمی منظر نامے سے ہٹانے میں کلیدی کردار ادا کیا ہے، بلاول مودی کے یاروں کا اتحادی ہے جبکہ ہمارے دل اہل کشمیر کے ساتھ دھڑکتے ہیں مودی کو کشمیر ہضم نہیںکرنے دیں گے ، بلاول کو اس موضوع پر سیاست چمکانے کا بھی موقع نہیںملے گا، ان کے والد سے چوری شدہ ایک ایک پائی نکلوائیں گے، بلاول نے شاید سی پیک کے جے سی سی کے فیصلے نہیں دیکھے، اگلے مہینے وزیراعظم عمران خان سی پیک کے تحت اکنامک زونز کا بھی افتتاح کرینگے ۔
