سکھر، تیز رفتار کار دیوار سے ٹکرا گئی، ایک شخص جاں بحق، دو خواتین زخمی

سکھر (نمائندہ جسارت) سانگی کے قریب موٹر وے پر تیز رفتار کار دیوار سے ٹکرا گئی، ایک شخص جاں بحق، دو خواتین زخمی۔ ریسکیو ذرائع کے مطابق ضلع سکھر کے علاقے سانگی کے قریب موٹر وے پر ایک تیز رفتار کار ڈرائیور سے بے قابو ہوکر دیوار سے ٹکرا گئی، جس کے نتیجے میں کار میں سوار 23 سالہ محمد عامر ولد عبدالرزاق زخموں کی تاب نہ لاتے ہوئے چل بسا جبکہ اس کے ساتھ کار میں سوار دو خواتین مسمات منظوراں بی بی زوجہ غلام مصطفی اور اس کی بیٹی سدرہ مصطفی زخمی ہوگئیں جن کو فوری طور پر پہلے تعلقہ اسپتال روہڑی اور بعد ازاں نازک حالت کے باعث سکھر کے نجی اسپتال لے جایا گیا۔ حادثے کا شکار افراد ملتان سے کراچی جارہے تھے۔ سکھر پولیس کی سماجی برائیوں کیخلاف کارروائیاں، سانگی پولیس نے جوئے کے اڈے پر چھاپا مار کر جوا ڈیلر سمیت 5 جواریوں کو گرفتار کر کے مقدمہ درج کرلیا۔ گرفتار ملزمان میں قربان، اشرف، فہیم و دیگر شامل ہیں۔ سکھر پولیس نے شاہ بیلو کچے میں ڈاکوؤں کیخلاف کارروائیاں مزید تیز کردی ہیں۔ ترجمان سکھر پولیس کے مطابق پولیس اور ڈاکوؤں کے درمیان فائرنگ کا تبادلہ ہوا۔ پولیس نے شاہ بیلو کچے میں ڈاکوؤں کیخلاف گھیرا مزید تنگ کردیا ہے۔ ڈاکوؤں کی متعدد کمیں گاہیں، ٹھکانے چوکیاں تباہ کردی گئیں، مطلوب ڈاکوؤں کا تعاقب کیا جارہا ہے، پولیس اور ڈاکوؤں کے درمیان فائرنگ کا تبادلہ جاری ہے۔