نوابشاہ، پولیس موبائل فٹ پاتھ پر چڑھ گئی، سات اہلکار زخمی

نوابشاہ (ڈسٹرکٹ رپورٹر) دادو میں الیکشن ڈیوٹی پر جاتے ہوئے تیز رفتار پولیس موبائل فٹ پاتھ پر چڑھ گئی، دو خواتین پولیس اہلکاروں سمیت سات اہلکار شدید زخمی، ایک خاتون اور مرد اہلکار کی حالت تشویشناک، ایس ایس پی اسپتال پہنچ گئے۔ رینجرز پیٹرول پمپ بائی پاس پر تیز رفتار پولیس موبائل فٹ پاتھ پر چڑھ گئی، جس کے نتیجے میں دو خواتین پولیس اہلکاروں سمیت سات اہلکار شدید زخمی ہوگئے۔ زخمی ہونے والوں میں خواتین اہلکار کرن خانزادہ اور روزینہ سولنگی شامل ہیں جبکہ مرد اہلکاروں میں محمد چٹل جمالی، منصور علی، خان محمد، محمد حنیف اور عرض محمد شامل ہیں، جن کو نازک حالت میں پیپلز میڈیکل اسپتال منتقل کیا گیا، جہاں پر ان کی حالت تشویشناک بتائی جاتی ہے۔ واقعہ میں پولیس پولیس موبائل کو بھی سخت نقصان پہنچا ہے۔ حادثے کی اطلاع پر ایس ایس پی تنور تنیو کا فوری نوٹس، زخمی اہلکاروں کے علاج معالجے کے لیے انتظامیہ کو تمام سہولیات بروئے کار لانے کی ہدایات جبکہ پیپلز میڈیکل اسپتال انتظامیہ کو بھی زخمی پولیس اہلکاروں کے علاج کے لیے کوئی کسر نہ اٹھانے کی ہدایت کی۔ واضح رہے کہ پولیس اہلکار دادو میں ہونے والے ضمنی الیکشن میں ڈیوٹی کے لیے جارہے تھے کہ حادثہ پیش آیا۔