میانوالی، سرگودھا (آئی این پی) میانوالی میں ٹرالر اور ایمبولینس میں تصادم کے نتیجے میں بچوں اور خواتین سمیت 9 افراد جاں بحق ہوگئے۔ میانوالی کے قریب ملتان روڈ ہیڈ پکا کے قریب ایمبولینس اور ٹریلر میں تصادم ہوا، حادثے کے بعد ایمبولینس میں سلنڈر پھٹنے سے آگ لگ گئی۔ ایمبولینس میں آگ لگنے سے بچوں اور خواتین سمیت 9 افراد جھلس کر جاں بحق ہوگئے۔ حادثے کی شکار ایمبولینس مریض اور اس کے اہل خانہ کو بھکر سے راولپنڈی لے کر جارہی تھی۔ پولیس حکام کے مطابق لاشوں کوڈی ایچ کیو اسپتال میانوالی منتقل کردیا گیا، قانونی کارروائی کے بعد لاشوں کو ورثا کے حوالے کیا جائے گا۔ سرگودھا میں ڈکیتی چوری کے مختلف واقعات میں ایک کار اور چھے موٹر سائیکل سمیت لاکھوں کا مال وزر لوٹ لیا گیا۔ ذرائع کے مطابق سرگودھا خوشاب روڈ شاہپور سٹی شاہ دا روضہ موڑ پر 2 مسلح ڈاکووں نے فائرنگ کرتے ہوئے گن پوائنٹ پر ساہیوال کے امجد، فیصل سے نقدی اور موبائل فون چھین لیے۔ سرگودھا کے چک 25 شمالی کے قریب چار مسلح ڈاکو موٹر اسلم، دوسری موٹرسائیکل پر سوار میاں بیوی اور کار سوار پانچ افراد سے طلائی زیورات، نقدی، موبائل فون چھین کر فرار ہوگئے۔ شاہپور صدر میں ہیڈ محمد والا کے قریب موٹر سائیکل سوار تین مسلح ڈاکووں نے چک موسیٰ کے محمد فاروق سے ہزاروں کی نقدی، گاڑی کی کاپی، شناختی کارڈ، عبدالوحید سے موبائل فون اور نقدی چھین لیے۔ سہیل پارک میں قاسم اعجاز کی سوزوکی کار چوری کرلی گئی۔ سیٹلائٹ ٹائون شاپنگ مال میں طلحہ کا ڈیڑھ لاکھ مالیتی موبائل فون چرا لیا گیا۔ نواحی چک 48 شمالی میں سعید کا موٹر سائیکل چور لے گے۔ سیٹلائٹ ٹائون نجی اسپتال کے باہر کھڑی کمال احمد کی موٹرسائیکل چور لے اڑے۔ علاقہ احسان کالونی گلی نمبر 4 سے شہری کی موٹر سائیکل چور لے گئے۔ سرگودھا شہر میں سٹی اور ہیڈ برج کے نیچے گلی میں حبیب کی موٹر سائیکل چور لے گئے۔ قصبہ جھاوریاں کے موضع حیات پور میں چور ایوب کی موٹر سائیکل لے اڑے۔ سرگودھا کے چک 104 جنوبی میں عرفان کی موٹر سائیکل چور لے گئے۔ ساہیوال کے محلہ محمدیہ کالونی شہزاد پارک میں چور فاروق کے گھر سے طلائی زیورات اور 20 ہزار کی نقدی لوٹ کر فرار ہوگئے۔ بھلوال بلاک 13 میں غلام عباس کے ڈیرہ سے قیمتی بکری تین بچوں سمیت چرالی گئی۔ پولیس مصروف تفتیش ہے۔
