لاہور(جسارت نیوز) 4میچوں کی سیریز کے لیے عمان کی ہاکی ٹیم پاکستان پہنچ گئی ہے ۔ پی ایچ ایف کے عہدیداروں نے لاہور ائرپورٹ پر مہمان ٹیم کا استقبال کیا۔ ٹوکیو اولمپک کی تیاریوں میں مصروف پاکستانی ہاکی ٹیم اور عمان کے درمیان پہلا میچ آج نیشنل ہاکی اسٹیڈیم لاہور میں کھیلا جائے گا۔ دوسرا میچ دوسرا میچ کل شیڈول ہے جبکہ تیسرا میچ 4 اکتوبر کو رکھا گیا ہے۔ سیریز کا چوتھا میچ 6 اکتوبر کو نیشنل ہاکی اسٹیڈیم میں ہی کھیلا جائے گا۔عمان ہاکی ٹیم کے ہیڈ کوچ طاہر زمان کا کہنا ہے کہ بھرپور تیاریوں کے ساتھ پاکستان آئے ہیں، پرامید ہوں کہ گرین شرٹس کے ساتھ اچھے اور جاندار میچز ہوں گے۔صحافیو ںسے خصوصی بات چیت میں طاہر زمان کا کہنا تھا کہ پاکستان کا شمار دنیا کی مضبوط ترین ٹیموں کے ساتھ ہوتا ہے، مضبوط ٹیم کے ساتھ کھیلنے سے جونیئر ایشیا کپ کی تیاریوں میں مدد ملے گی۔عمان ٹیم کے مینیجر کا کہنا تھا کہ پاکستان آنے کی بہت زیادہ خوشی ہے، میری طرح ٹیم کے تمام کھلاڑی پر جوش ہیں، پاکستانیوں کی مہمان نوازی نے خاصا متاثر کیا ہے۔پاکستان ہاکی فیڈریشن کے عہدیدار کرنل آصف کھوکھر نے کہا کہ سیریزکی وجہ سے نہ صرف انٹرنیشنل ہاکی کے مزید دروازے کھلیں گے بلکہ گرین شرٹس کو اولمپک کوالیفائنگ رائونڈ کی تیاریوں میں بھی مدد ملے گی۔
