سکھر (آن لائن)سکھر میں نیب ٹیم کا بلاول زرداری کی آمد سے کچھ دیر قبل گرفتار پیپلزپارٹی کے رہنما خورشید شاہ کی رہائش گاہ پر چھاپا۔ کمروں کی تلاشی، بنگلے کی پیمائش، چھاپے کی اطلاع پر سیکڑوں کارکنان پہنچ گئے،احتجاجی مظاہرہ ، نعرے بازی، پولیس کی بھاری نفری طلب کرلی گئی ۔قومی احتساب بیورو کی ایک ٹیم نے نیب افسران اور مجسٹریٹ کے ساتھ پیپلز پارٹی کے گرفتار رہنما سید خورشید احمد شاہ کی رہائش گاہ واقع سندھ کوآپریٹو ہاؤسنگ سوسائٹی پر اس وقت سرچ آپریشن کیاجب وہاں پر پاکستان پیپلز پارٹی کے چیئرمین بلاول زرداری کی آمد کے حوالے سے تیاریاں کی جارہی تھیں ۔نیب کی ٹیم نے رہائش گاہ کے تمام کمروں کی تلاشی لی اور خورشید شاہ کی رہائش گاہ کی اس کے نقشے کے مطابق پیمائش بھی کی۔ نیب ٹیم کا سرچ آپریشن ایک گھنٹے سے زائد جاری رہا تاہم نیب ٹیم کو کوئی شواہد یا
دستاویزات نہیں مل سکیں۔ نیب ٹیم کی کارروائی کی اطلاع پر پیپلز پارٹی کے کارکنوں کی بڑی تعداد بھی خورشید گاہ کی رہائش گاہ پر پہنچ گئی اور انہوں نے نیب ٹیم کے اس چھاپے کے خلاف احتجاجی مظاہرہ کیا اور نیب و وفاقی حکومت کے خلاف نعرے بازی کی۔ نیب کی ٹیم نے سرچنگ مکمل کرنے کے بعد خورشید شاہ کے صاحبزادے و ایم پی اے سید فرخ شاہ کو تحریری طور پر یہ لکھ کر دیا کہ انہوں نے سرچ کیاتاہم کچھ برآمد نہیں ہوا اس لیے وہ یہاں سے کچھ بھی لیکر نہیں جارہے ہیں۔
نیب چھاپا
