کراچی (اسٹاف رپورٹر) 20 ویں ایشین سینئر مینز والی بال چیمپئن شپ میں پاکستان نے روایتی حریف بھارت کو سنسنی خیز مقابلے کے بعد 3-2 سے شکست دے دی۔ ایران کے دارالحکومت تہران میں جاری چیمپئن شپ کے ایک اہم میچ میں پاکستان نے راویتی حریف بھارت کو 3-2 سے ہرایا، پاکستان نے بھارت کے خلاف پہلے اور دوسرے سیٹ میں 25-23 اور25-23 سے کامیابی حاصل کر کے برتری حاصل کی تاہم بھارت نے اگلے دونوں سیٹ بالترتیب 25-20 اور 25-19 سے جیت کر مقابلہ برابر کر دیا، فیصلہ کن سیٹ میں پاکستان نے شاندار کھیل کا مظاہرہ کیا اور بھارت کو 15-6 سے آئوٹ کلاس کرکے میچ جیت لیا، چیمپئن شپ میں 16 ممالک کی ٹیمیں حصہ لے رہی ہیں جن میں ایران، آسٹریلیا، قطر، سری لنکا، جاپان، تائیوان، تھائی لینڈ، ہانگ کانگ، قازقستان، چین ، عمان، بھارت، پاکستان، کوریا، کویت اور انڈونیشیاء شامل ہیں۔
