لاڑکانہ(نمائندہ جسارت) لاڑکانہ میں سیاہ کاری کے الزام میں مسلح افراد کی فائرنگ سے تین بچوں کی ماں قتل، ملزمان فرار، پوسٹ مارٹم کے بعد لاش ورثا کے حوالے، مقدمہ درج نہ ہوسکا اور نہ کوئی گرفتاری عمل میں آسکی۔ تفصیلات کے مطابق لاڑکانہ شہر کے تھانہ رحمت پور کی حدود علی آباد میں مسلح افراد نے فائرنگ کرکے سیاہ کاری کے الزام میں تین بچوں کی والدہ 32 سالہ ساجدہ برڑو کو قتل کرنے کے بعد فرار ہوگئے۔اطلاع پر پولیس نے پہنچ کر واقعے کے متعلق تفصیلات معلوم کرتے ہوئے لاش پوسٹ مارٹم کے لیے چانڈکا اسپتال منتقل کی جہاں ضروری کارروائی کے بعد لاش ورثا کے حوالے کی گئی۔ پولیس کے مطابق علی آباد محلے میں دو مسلح ملزمان نے فائرنگ کرکے ساجدہ برڑو کو سیاہ کاری کے الزام میں قتل کرنے کے بعد فرار ہوگئے ہیں جن کی گرفتاری کیلیے چھاپے مارے جارہے ہیں۔ دوسری جانب آخری اطلاع موصول ہونے تک واقعے کا مقدمہ درج نہ ہوسکا اور نہ ہی کوئی گرفتاری عمل میں آسکی۔
