کراچی (اسٹاف رپورٹر)چیف جسٹس آصف سعید کھوسہ کی ہدایت پر ماڈل کورٹس کی پیش رفت کا جائزہ لینے کے لیے سندھ ہائیکورٹ میں عملدرآمد اور رابطہ کمیٹی کا اجلاس ، صدارت ڈائریکٹر جنرل ایم اینڈ ای سی سہیل ناصرنے کی۔ اجلاس میں رجسٹرار سندھ ہائیکورٹ، رکن ایم آئی ٹی اور دیگر شریک ہوئے۔ اجلاس میں گواہوں کی عدم پیشی ، مستقل پراسیکیوٹرز کی عدم دستیابی، ڈاکٹروں کی بطور گواہ عدم پیشی اور میڈیکل رپورٹس کی پیشی میں تاخیر ،ملزمان کی جیلوں سے عدم پیشی ، کیمیکل رپورٹس میں تاخیر کا جائزہ لیا گیا، آئی جی جیل نے یکم اپریل سے 30 اگست 2019 ء تک پیش نہ کیے جانے والے قیدیوں سے متعلق آگاہ کیا۔علاوہ ازیںملیر ماڈل کورٹ نے 9 سالہ بچے کو تشدد کر کے قتل کرنے کے مقدمے میں جرم ثابت ہونے پرمجرم نجم الدین کو سزائے موت سنادی۔ مجرم نجم الدین کیخلاف 2018 ء تھانہ بن قاسم میں قتل و دیگر دفعات کے تحت مقدمات درج کیا گیا تھا۔
