راولپنڈی: وزیر ریلوے شیخ رشید نے کہا ہے کہ میں رواں سال اکتوبراور نومبر میں پاک بھارت جنگ دیکھ رہا ہوں۔
پنجاب میں یکجہتی کشمیر کی تقریب سےخطاب کرتے ہوئے شیخ رشید احمد نے کہا کہ پچھلے 23 دنوں سے سفاک مودی نے دنیا میں عجیب سماں بنا دیا ہے،کشمیر کی پرفضا وادیاں آگ اور خون کی وادیوں میں بدل سکتی ہیں۔ پاکستان اور بھارت کے درمیان 10 جنگیں ہوچکی ہیں یا ان کے قریب سے لوٹے ہیں۔.
قوم کوجنگ کیلئے تیار کرنے نکلا ہوں، ہمیں کشمیریوں کا ساتھ دینا ہے ورنہ تاریخ معاف نہیں کرے گی اور قائد اعظم کا خواب پورا نہیں ہوگا، ہمارے دفاعی اقتصادی مسائل ہیں لیکن 130 ملین ایسے جوان ہیں جو پاکستان اور اسلام پر مرتے ہیں۔
اقوام متحدہ نے مسائل کو کبھی حل نہیں کیا، سیاستدان وہ ہوتا ہے جو مستقبل کو جانتا ہے، یہ گھی سیدھہ انگلی سے نہیں نکلے گا۔ ہماری افواج نے 72 سال سے جو تیاریاں کی ہیں اس کے فائنل راٰؤند کا وقت آگیا ہے، فاشسٹ مودی کے راستے کی رکاوٹ پاکستان ہے۔
ان کا کہنا تھا کہ چاہ بہار جانے کے لیے گوادر اس کے راستے میں حائل ہے، ہماری خوش قسمتی ہے چین جیسا دوست ہمارے ساتھ ہے۔
وزیر ریلوے نے کہا کہ کل بھی چین کے جنرل کی جنرل باجوہ سے ملاقات ہوئی، ساری دنیا ہمارے ساتھ ہے لیکن پیٹرول پمپ والے ہمارے ساتھ نہیں۔ پاکستان کی تقسیم سازش کے تحت کی گئی تاکہ ہم مسائل سے نہ نکل سکیں۔
