لاڑکانہ (نمائندہ جسارت) ایس ایس پی لاڑکانہ مسعود احمد بنگش کی ہدایات پر لاڑکانہ پولیس نے مختلف علاقوں میں کارروائیاں کرتے ہوئے 9 جواریوں سمیت سنگین نوعیت کے مقدمات میں اشتہاری، روپوش و مطلوب 13 ملزمان کو گرفتار کرکے اسلحہ، منشیات، موٹر سائیکل، نقدی اور موبائل فونز برآمد کرکے مقدمات درج کرلیے۔ مارکیٹ پولیس نے دوران چیکنگ سنگین نوعیت کے مقدمے میں مطلوب ملزم امجد جلبانی کو پستول اور گولیوں سمیت، رحمت پور پولیس نے دوران چیکنگ بازیگر پل سے ملزم حبیب اللہ خروس کو پستول اور گولیوں سمیت، ائرپورٹ پولیس نے دوران چیکنگ ملزم میر محمد ساریو کو چرس سمیت، نوڈیرو پولیس نے دوران چیکنگ اشتہاری ملزم باقر شیخ کو، دڑی اور تعلقہ پولیس نے جوئے کے اڈوں پر چھاپے مار کر 9 جواریوں گل حسن، مہران، بڈہل، پرویز بروہی، واحد بخش، سعید، سائت، نادر اور ثنااللہ کو نقدی سمیت گرفتار کرلیا۔ دوسری جانب باڈہ پولیس نے شہری غلام مصطفی جبکہ تعلقہ پولیس نے شہری ظہیر بھٹی کی موٹر سائیکل برآمد کرکے مالکان کے حوالے کردی ہیں۔
